陳芊榕開箱神奇漢藥房　童年記憶與味道撲鼻而來

■以下為台文對照版

綴陳芊榕掀開神奇漢藥房　鼻著細漢時熟識的芳味

台語撰文：邱祖胤
審訂：陳芊榕、游沛綺、邱景琦

細漢的時陣，記持有真濟快樂，亦有真濟苦澀，有的花色真濟，有的芳味貢貢芳。有人選擇用講的、用寫的，共精彩的部分寫出來，有的人用畫的、用繪本的方式，共頭殼底上特別的內容記落來。

舊年（2025）才今得著金鼎獎的繪本作家陳芊榕，十幾年來一直想欲共家已厝內開漢藥房的故事講出來，伊的繪本作品《神奇漢藥房》，毋但透過母語𤆬領現代的囡仔了解古早漢藥房的空間佮智識，嘛予家己重新體會彼段使人數念的時間。這本冊毋但得著金鼎獎，猶有入圍國內外的比賽。

陳芊榕老實講，伊家已是做阿母了後，才開始學畫圖、學看繪本，透過佮囡仔「共讀」的過程，無疑悟共家己的母語抾轉來。

陳芊榕講，伊細漢是佇學校講台語會予人罰錢的年代，甚至拍拚共「國語」講標準，予人叫是「台北來的囡仔」，伊感覺真風神。但是反倒轉來，應該予伊感覺驕傲的，是厝內彼間老母經營的漢藥房，因為老師捌佇學校講「漢醫不如西醫、漢醫是落伍的」的話，煞來予伊感覺著見笑、歹勢。

總是佇台灣這塊土地面頂，身分佮語言的認同，從來攏毌是一層簡單的代誌。

毋過陳芊榕一直咧試真濟方法，亦真拍拚，予伊揣著一條家己佮身軀邊的人攏感覺自在的路。

22歲揹債　老母愛扞一間店

陳芊榕是台中人，伊的台語真輾轉，認真起來有一種播音員的親切佮專業，氣口總是淡薄仔輕鬆，用字遣詞真自然，亦真講究，毋過聽會出來背後有真濟故事，而且暗流小湧轉大湧，甚至予人感覺著親像拄著痟狗湧。

故事就對𪜶老母的漢藥房講起。

親像陳芊榕厝內的人對伊若掌上明珠仝款，陳芊榕的老母柯碧，自細漢仝款受著後頭厝的栽培，無負厝內人的向望，一路讀到台中女中，而且考牢靜宜大學，可惜大學讀到一半，拄著外公過身，學校通知伊「阿爸過身矣，你趕緊轉去厝內」，22歲的伊，就按呢共厝內負債的漢藥房扞起來。

陳芊榕講，外公當年做漢藥大賣，進貨磕袂著就是規隻船，風險誠懸，萬不一拄著風颱亦是大湧，定定規船拍損去，有一斗生理受著影響，外公舞甲雜頭，

心頭鬱卒，身體嘛去拍歹，路尾煞來著病，就按呢來過身。陳芊榕的老母對負債開始扞店，一路對了錢做到賰錢，閣通買樓仔厝，共資產留落來，倚靠的毋是啥人的安排，是去予環境所逼，才來一步一步行出家己的路。

陳芊榕過喙講𪜶老母在生以前講的一句話：「我的人生是無通計畫的，我哪會知影阮阿爸遐早就過身？我是拄著矣，就愛認真拍算。」這句話講甲輕巧、簡單，聽佇旁人的耳仔內，真正是半世人的輕重。

閃避台語　嘛共漢藥房少女的身分覕起來

拄著，就認真拍算。陳芊榕就是受著這款的家教來大漢的，小學4年級就開始佇店裡鬥相共，上菜市仔買菜，閣較大漢的時陣，老母開始算薪水予伊，予伊鬥相共顧店，下早仔8點準時「上班」，慢分袂使、上班時間看報紙嘛袂使。

陳芊榕𪜶老母做代誌真頂真，人若踏入店頭，定著會共妝化好、穿插真撆紮整齊，絕對袂予人看著家己荏懶的彼面，表現著生理人的專業佮禮數，這影響著陳芊榕真濟。

不而過，仝這个時陣，陳芊榕煞來佮家己的尊嚴相踏脫──這个尊嚴，就是來自佮家己出身上倚的言語佮厝內底佇做的行業。

陳芊榕佇厝裡佮厝內的人講台語、佇店裡佮人客講台語，是誠自然的代誌，毋過一下踏入校門、去學校讀冊，伊講的話就來切換做華語，毋過真奇怪，這款切換，捌予伊產生一種風神氣 ，「我的國語講甲標準，人叫是我是台北來的囡仔，阮心內竟然有淡薄仔歡喜，這馬看起來，彼有影是一種真奇怪的心態。」

但是比起講袂出喙的語言，伊閣較無想欲提起的，竟然是厝內底經營的漢藥房。有一段時間，陳芊榕並無想欲予同學知影厝裡是開漢藥房的，因為當時的老師捌共同學講過，食漢藥是落伍的選擇，比起西醫，彼是落伍的、無夠科學的。但是佇彼个無健保的年代，這間「壽春漢藥房」生理好到店猶未開門，就已經有人佇外口排隊聽候，嘛幫助真濟人解決健康方面的問題。

這層予伊心肝頭結規毬的代誌，到甲伊家己做了人的老母、開始動筆共這間店畫落來了後，才沓沓仔予伊家己來攤開看，嘛理解過去家
己是咧想啥貨。

華語書寫　母親的故事減一味

陳芊榕捌試過共這段觸纏的記持，用華語來寫佮共《我的母親》這本繪本畫落來，「我感覺阿母的一生佮漢藥房真相仝，攏仝款幫助過真濟人，煞因為時代的變化，漸漸仔予人放袂記得。我應該開閣較濟時間，沓沓仔共伊佇漢藥房的一段故事講出來。」

老母佇陳芊榕33歲時過身，陳芊榕36、37歲時捌動念共這一切寫落來，想袂到「壽春藥房」嘛輸予時代巨輪的硩，總算嘛行到收煞這步。到伊完成《我的母親》的時，已經倚40歲囉，毋過總感覺減一味。

好得佳哉有伊的囡仔加入，伊佮後生互相陪伴佮學習，共家己的母語抾轉來，嘛一步一步共伊家己「神奇漢藥房」的記持揣倒轉來。

陳芊榕提起，2012年彼年，伊因為先生工課的關係，規家搬到新竹，初初彼時，伊佇菜市仔開喙講台語，「無人聽有，因為我蹛的社區拄好是眷區，我講台語的時陣，𪜶驚一趒，我嘛驚一趒。」彼擺意外，予伊決心欲主動創造講台語的環境。

自按呢，伊加入一个台語親子共學團，逐禮拜見面兩擺，大人盡量愛講台語，囡仔就自由發揮。

後生陪伴　兩人互相的小秘密

佇這段過程當中，陳芊榕佮後生有家己的秘密時間，後生捌叫是這个言語干焦伊佮阿母才會曉講，當伊有無想欲佮別人分享的代誌的時陣，就干焦佮阿母用台語講。

包括台語繪本這層代誌嘛是，《神奇漢藥房》完成的過程，𪜶後生差不多攏佇伊的身軀邊，伊自細漢就知影阿母咧寫這个故事，嘛聽過阿母一擺閣一擺講著外媽的代誌，嘛捌講著彼間伊從來毋捌踏入過的漢藥房。毋過頭仔，囡仔對「共厝裡的代誌畫做冊予全世界看」這層代誌，毋是蓋同意。

陳芊榕會記得後生捌按呢共伊講：「你是阮阿母，你毋免佮別人講遮濟代誌，這是咱的代誌，你毋免去共人講。」彼个氣口裡有一種囡仔氣佮志氣，若像家族記持應該留佇厝內就好矣。

這段期間，陳芊榕定定想起過去和阿母講話的情景，講台語像若阿母的形影閣轉來陪伴伊的感覺，伊一直感覺寫冊所欠的彼一味，就是台語的氣味，彼時陣和媽媽攏是用台語對話，嘛因為按呢才有「台語繪本」的構想，伊對華語版的《我的母親》行到台語版的《神奇漢藥房》，這擺總算感覺著味矣。

拍開藥櫥仔　家傳祕方有聲嘛有色

「一下開始我對家己的圖嘛是足無信心，足驚畫大張的圖。」陳芊榕向記者展開親像手捗大細的冊來解說：「我就先畫細張的，我感覺按呢家己嘛較好控制。」想袂到這个細開本又閣古錐的冊，提去展覽的時，顛倒大受歡迎。

佇冊內底，陳芊榕共家己畫做主角「阿妹」，𤆬讀者去參觀伊上熟似的彼間漢藥房，講伊按怎顧店，做阿母的下跤手，學切人蔘，學會曉拆藥仔，對家己厝內的藥櫥、冰櫃，無一項毋知。

「阿妹」講著家傳的「轉骨方」，特別受人歡迎。有「食了考試會著100分」的「巧巧丸」，佮滷茶葉蛋用的滷包，閣有形體真怪奇的蛤蚧、海馬……

伊畫的種種，攏予人看到目睭金金金。講遮是「神奇」漢藥房，一點仔都袂傷譀。

檢定考試　刁工共台語揣轉來

紲落來，《神奇漢藥房》出版了後，開始受著真濟讀者的歡迎，嘛直直著獎，陳芊榕心肝頭感覺淡薄仔安慰，想講家己總算沓沓仔共母語抾轉來，嘛用家己的母語記錄家己上看重的代誌，愈罕得的是，伊佮伊的囡仔，手牽手行過這一切。

陳芊榕講，講母語這層代誌，著愛自然，若是干焦欲倚靠學校教的彼套，絕對是無夠的，就算政策對本土言語愈來愈看重，教學現場嘛是照常出現完全無仝的狀況。

「捌有老師肯定佮鼓勵我的囡仔，請伊佇班級紹介台語予同學聽，毋過嘛有老師捌直接佇聯絡簿頂面反應，講阮囝佇班講傷濟台語矣，會影響著其他的同學。」陳芊榕感概，一个老師用啥物態度看待台語，定定就決定囡仔敢願意佇教室內開喙無。

2024年，陳芊榕閣做一个真特別的決定：報考教育部「台灣台語言語能力認證考試」，終其尾考著中高級（B2）。伊講，攢考試的過程，才予伊真正了解「原來欲共這个言語留落來，有影足無簡單的」。

母語這條路　彎彎斡斡毋過真實在

對歹勢佇公開場面講家己的母語，到陪伴家己的囡仔學母語，閣進一步以母語記錄家己上看重、佮家己的生活上貼倚的代誌，教大眾以台語來熟似佮了解漢藥房，陳芊榕所行的這條母語之路，看起來敢若真僫行，毋過真實在。

如今漢藥房已經無像較早生理遮好，遐的蛤蚧、鉸刀、鐵盒仔佮藥材的氣味，干焦釘佇陳芊榕的記持佮畫筆之間，毋過一本神奇的繪本，煞恬恬陪伴佇真濟生份囡仔的枕頭邊，一遍閣一遍予人朗讀、聽古，陪伴閣較濟講台語的囡仔睏落眠。

陳芊榕的老母等袂到彼个會曉講台語的孫出世，伊扞起來的彼間漢藥房的故事，煞換一種方式，繼續活佇後一代人的耳仔底。

語言佮記持的消失，自來毋是一工兩工的代誌，若是欲共抾轉來，就愛倚靠有心人一筆一畫、一字一句，沓沓仔、用有淡薄仔固執的方式，來共留落來。